CAGAYAN DE ORO CITY-Gi-depensa ni PNP regional spokesperson Supt Lemuel Gonda kon nganong gikatag nila ang pipila ka snipers sa mga lugar nga giagian sa traslacion sa Itom nga Nazareno sa syudad kagahapong adlawa.
Miingon si Gonda nga epekto kini sa nadawat nga seryosong bahad sa terorismo nga mohimo’g pag-atake bisan unsang oras sa dakbayan.
Hinoon,malinawon gisaulog ug gitapos sa 200-mil ka deboto sa Nazareno ang traslacion isip kabahin sa kasaulugan sa kapistahan niini kagahapong adlawa.
Gisugyot usab ni Gonda nga angay magbaton sa igong ihap sa tropa sa gobierno ug angay hingpit i-wala ang mga sakyanan samtang moagi ang prosesyon sa mga deboto.
Samtang gipanalipdan ni Fr Julius Clavero kinsa kora paroko sa Sr Jesus Nazareno ang pagpahimutang sa snipers sa PNP-10 sa pipila ka tag-as nga gambalay kagahapong adlawa.
Miingon si Clavero nga katuyuan lamang niini nga masiguro nga mahatagan sa 2-mil ka miembro sa govt forces nga luwas ang tanang deboto sa Itom nga Nazareno kagahapong adlawa.
Gani,sobra-sobra ang pagpasalamat niini sa tanang mitabang aron magmalampuson ang kapistahan sa Nazareno ilabina ang traslacion gikan sa San Agustin Cathedral pabalik sa parokya sa Sr Jesus Nazareno.
Samtang wala matago sa canon law lawyer sa Archdiocese of Cagayan de Oro nga si Msgr Rey Monsato ang iyang pagbati kabahin sa subli pagbalik sa orihinal nga rota sa traslacion sa Itom nga Nazareno.
Kini human adunay giingong bikil sa pipila ka pari kaniadto kabahin sa paghimutang sa replika sa Nazareno ayha ipaubos sa traslacion.
Miingon si Monsanto nga kon kinsa man ang mosunod nga mga kora paroko sa Sr Jesus Nazareno Parish ug Sr San Agustin Cathedral angay masubay ang orihinal nga rota sa prosesyon.
Kini sa tuyo nga dili mawala ang bililhong kahulugan kon nganong gipadala ang Nazarenong Itom gikan sa kauluhan padulong sa syudad siyam ka tuig na nag-labay.
