CAGAYAN DE ORO CITY-Gitin-aw sa Special Investigation Task Group o SITG-Rotoras nga wala pa nila gisirado ang imbestigasyon sa kaso sa pagpatay kang late University of Science and Technology of Southern Philippines ug Philippine Association of State University and Colleges president Dr Ricardo Rotoras.
Kini bisan nadakpan na ang usa sa mga giingong person of interest sa krimen nga si Architect Rey Galua,48;minyo; negosyante ug politiko sa Caraga Region.
Matud ni Cagayan de Oro City Police Office spokesperson C/Insp Mardi Hortillosa nga giaresto sa Criminal Investigation and Detection Group si Galua tungod sa duha ka search warrants gikan sa korte ug dili sa kasong pagpatay kay Rotoras.
Walay kasayuran usab ang Task Force kon kinsa ang mga person of interest nga anaa sa listahan sa CIDG sa pagpatay kay Rotoras.
Samtang bisan ang pamilyang Rotoras ang nagduda sa pagkasikop kang Galua kung may kalabutan kini sa pagpatay kang Dr Ricardo Rotoras.
Si Eddie Rotoras miingon nga gidakop si Galua tungod sa illegal possession of firearms and explosives ug dili sa pagpatay sa iyang igsoon.
Una nang gitin-aw ni CIDG-10 chief investigator SPO4 Noel Oclarit nga gidakop si Galua tungod sa pagbaton niini sa dili lisensyadong mga armas.
Nagpaggawas na usab sa direktiba si City Mayor Oscar Moreno nga ipaubos sa imbestigasyon si Galua aron mahataga’g katin-awan kung nganong nahimo kining person of interest sa kaso ni Rotoras.
