CAGAYAN DE ORO CITY-Nakompiskar ang 14 ka gitoohang shabu nga balor 30-mil pesos batok sa notado nga suspected drug pusher ug user diha sa Brgy Bugo ning syudad kagabii.
Kini human gilusad sa PDEA-10 ug NBI-10 ang joint buy bust operation hinungdan nadakpan ang 44 anyos nga si Daryl Macaltao, minyo, walay trabaho ug nagpuyo sa maong dapit.
Gi-angkon ni Macaltao nga gapamaligya siyag shabu tungod sa gihambin nga liver canser sa iyang kapikas.
Sa pakighinabi sa Bombo Radyo kang Macaltao, iyang gi-angkon nga napugos siya’g pamaligya ug druga kay naglisod siyag bayad sa galastuhon sa iyang kapikas nga nagsakit ug kanser.
Dugtong niini, gibutyag ni PDEA MisOr team agent GM Gomez nga dugay na nilang gibantayan si Macaltao ug nagsilbing ruta sa iyang ibaligya nga druga ang Western Mindanao ug syudad.
Gitumbok usab ni Gomez nga nalambigit ang suspek sa usa ka grupo sa Maranao shabu shipment ug distributor sa Mindanao.
