CAGAYAN DE ORO CITY-Gikasakit hinungdang gikondinar sa grupong Associaton of Concerned Teachers o ACT partylist Northern Mindanao chapter si Budget Sec Benjamin Diokno.
Kini human miprangka si Diokno nga wala una’y usbaw sa suhulan ang mga magtutudlo sa nasud ning tuiga.
Namahayag si ACT partylist Northern Mindanao chapter president Ophelia Tabacon nga daw mawala makita ni Diokno ang mga sakripisyo sa mga magtutudlo nga nag-antos sa ubos nga suhulan itandi sa mga pulis ug sundalo.
Giangkon ni Tabacon nga nahulipan sa kasubo ang ila unta nga kalipay dihang nadunggan ang taho nga sama sa PNP ug AFP,usbawan ang ilang mga suhulun ning tuiga.
Samtang gipakalma ni Dep-Ed City Administrative Section chief Dr Rosalio Vitorillo ang mga magtutudlo kabahin sa ilang kasuko ngadto kang Budget Sec Benjamin Diokno.
Kini human unang gibutyag ni Diokno nga tuig 2019 pa matuki ang salary increase alang sa mga magtutudlo ug dili mahitabo ning tuiga.
Gibutyag ni Vitorillo nga angay magpatigbabaw ang pagsilbing ehemplo sa mga magtutudlo ug dili ang ilang kasuko sa gobierno.
Kumbinsido usab si Vitorillo nga bisan mag-rally pa ang kauban nila na mga mga magtutudlo,dili na kini makausab kay pasado na ang 2018 national budget sa nasud.
Samtang gimanduan ni Pres Rodrigo Duterte ang iyang cabinet secretaries nga mangita’g paagi nga makakita’g pondo aron magamit pag-usbaw sa suhulan sa mga magtutudlo sa nasud.
Kini ang giingong gisulti ni Pres Duterte sa ilang cabinet meeting ug wala direkta miingon nga diha-diha mausbawan na usab ang suhulan sa DepEd ning tuiga.
Gibutyag ni Presidential spokesperson Harry Roque nga kaugalingong opinyon niini ang pagsulti nga sama sa kapolisan ug kasundaluhan,hayan mausbawan usab ang suweldo sa mga magtutudlo sa ning tuiga.
