CAGAYAN DE ORO CITY-Dismayado ang libuang tinun-an ingon man ang mga faculty USTP members sa kapi’g bulan na nga imbestigasyon sa kapolisan ug NBI sa kamatayon sa ilang presidente nga si Dr Ricardo Rotoras ning syudad.
Kini ang hinungdan nga dad-on nila ang ilang yangu-ngo kang Pres Rodrigo Duterte aron mapaspasan pa ang pagsulbad sa kamatayon ni Rotoras.
Miingon si USTP Supreme Student Council Pres Artemio Factos Jr nga giawhag nila ang mga tinun-an ug faculty members nga molakip pagpirma sa gihimo nila nga signature campaign alang sa ikasulbad sa kaso ug pagkab-ot sa hustisya alang sa ilang presidente.
Samtang,gitahod apan dili makatabang sa pagsulbad sa kamatayon ni Rotoras ang signature campaign sa mga estudyante ug faculty members nga ilang gihimo diha sa USTP campus ning syudad.
Kini ang tubag ni SITG-Rotoras spokesperson C/Insp Mardi Hortillosa kabahin sa gihimong lakang sa maong unibersidad.
Namugos si Hortillosa nga dili mahimong dali-dalion sa mga imbestigador ang pag-resolbar sa kaso kon mag-resulta lamang gihapon sa pagka-dismiss pag-abot sa korte.
Si Rotoras ang gipusil-patay sa duha ka suspek gawas sa iyang pinuy-anan sa Upper Carmen niadtong Disyembre 2017.
