CAGAYAN DE ORO CITY-Patay ang usa ka babaye human maaksidente ang gisakyang motorsiklo sa Zone 2, Brgy Tablon ning syudad kaganinang buntag.
Dead on the spot human ma-sideswipe sa dumptrak ang ulo sa biktima nga si Rosemarie Quirante, 20-anyos pataas ang pangidaron ug residente sa Brgy Iponan ning syudad.
Gidala usab sa ospital ang drayber sa motor nga si Julieto Jagupit, 38-anyos ug taga Barangay Agusan ning syudad.
Si P02 John Lamberd Pansiloy, imbestigador sa Cugman Police Station miingon nga ang drayber sa motor maoy mibangga sa trak samtang padulong sa Brgy Bugo.
Samtang gibutyag sa drayber sa dumptrak nga wala siya’y kasayuran nga siya ang naka-sidesweep sa motorsiklo nga gisakyan sa mga biktima kinsa gikamatay sa usa ka babaye.
Si Jason Dagatan, taga Bunawan Agusan del Sur miingon nga natingala na lamang siya kay kalit adunay mipaka sa ilang sakyanan.
Dugang pa ni Dagatan nga nalooy siya sa biktima ilabina nga nanglagpot ang utok niini.
