CAGAYAN DE ORO CITY-Nasikop sa militar ang tulo ka supporters sa teroristang Maute-ISIS nga responsable sa pagpusil-patay sa pipila ka Kristiyano nga unang namaligya’g furniture products sa Brgy Dadu,Balindong,Lanao del Sur.
Giila ni Lanao del Sur Provincial Police Office Dir Sr/Supt John Guyguyon ang mga suspek nga sila si Jamal Ramal Berongan alias Mayor, Ibrahim Alek Undi alias Brad Alexander ug Apao Dimacaling nga nanimuyo sa Brgy Gacap,Piagapo sa maong lalawigan.
Gibutyag ni Guyguyon nga giangkon sa mga suspek nga sila suporters sa mga terorista ug andam mopatay sa mga sundalo sa maong lalawigan.
Gani,giangkon sa mga suspek nga sila ang mipatay kanila ni Rolando Crisostomo;Julito Sarsaba ug Greg Baguio nga pulos taga Misamis Oriental kay gidudahang military assets niadtong Disyembre 6,2017.
Mismo ang tropa ni Col Generoso Ponio sa 103rd IB,Philippine Army ang nakasita sa mga suspek diin nakuhaa’g mga armas atol sa ilang pagka-aresto.
