CAGAYAN DE ORO CITY-Gihupay sa militar ang kabalaka sa publiko nga subli mohasi ang nabiling teroristang Maute-ISIS sa bisan asa nga bahin sa Mindanao.
Kini human gikompirmar ni Joint Task Force Ranao deputy commander Col Romeo Brawner nga nagpadayon pagpang-recruit ang grupo ni sub-commander Abu Dar sa bag-ong miembro human dul-ag libo ka Maute-ISIS ang napatay sa Marawi City.
Miingon si Brawner nga wala na’y kapas si Abu Dar nga mohimo’g pagpangatake ilabina nga nahurot na’g kamatay ang mga kauban niini nga anad sa giyera sa Lanao del Sur.
Gusto sa gobierno nga mahimong labing moderno nga nagbaton sa kultura, lig-ong pagtoong Islam ug ubang relihiyosong pag-obserbar ang makita sa tibuok kalibutan sa Marawi.
Kini ang hinungdan nga naghangyo si Pres Rodrigo Duterte nga tas-an pa’g gamay sa internally displaced persons o IDPs ang ilang pasensiya alang rehabilitasyon sa nagubang syudad.
Gihimo ni Presidential spokesperson Harry Roque ang pasalig nunot sa subli niya pagbisita sa katawhan sa Marawi City kaganihang buntag.
