CAGAYAN DE ORO CITY – Kampante ang liderato sa interim mngt sa Cagayan de Oro City Water District sa ilang posisyon nga padayong idumala ang sistemang panubig sa dakbayan.
Kini bisan nga nag-atubang sa hulga nga hulipan sa regular COWD mngt pinaagi sa pag-instolar kang Engr. Edna Najeal isip bag-ong general manager sa COWD.
Miingon si interim COWD General Manager Fermin Jarales nga anaa sila sa ensaktong baruganan nunot sa kopya sa LWUA order nga extended sila sa dugang unom ka bulan sa pagdumala sa panubig sa syudad.
Gibutyag ni Jarales nga pangitaan niya sa mando sa korte ang regular COWD board isip basehan sa ilang pagbalik-trabaho taliwala nga aktibo pa ang interim mngt nga nasubay sa balaod.
Pulos nangayo’g seguridad sa kapolisan ug Task Force Oro ang duha ka panig sa ilang pag-showdown sa COWD karong buntag.
Samtang gipadumduman ni Jarales ang 665 ka aktibo nila nga empleyado nga sundon ang sugong legal sa balaod.
Kini maoy kalabutan sa panganti sa regular COWD mngt nga mobalik na sa ilang trabaho epektibo ning adlawa.
Gibutyag ni Jarales nga suliran kini tali sa duha ka grupo ug maoy iyang hangyo nga dili magpa-apektar ang mga empleyado apan mag-pokus sa ilang tagsa-tagsa ka trabaho.
Sukad nag-early retire si Engr Antonio Young isip general manager sa ahensiya,pabiling wala pa’y nakahulip kaniya samtang padayong nag-atubang sa kontrobersya ang COWD.
Sa pikas bahin,wala na’y makapugong sa pagbalik sa regular mngt sa COWD epektibo ning adlawa.
Kini ang panganti ni acting regular COWD BOD chairman Gerry Caño nunot sa ilang pag-instolar isip general manager kang Najea karong adlawa.
Miingon ang opisyal nga pabiling wala nila ilha ang legalidad sa presensya sa grupo ni Jarales.
Kini tungod kay pabiling wala sila nakakupot sa LWUA order kabahin sa full intervention sa ahensiya diin sila kasamtangang napadaplin sa ilang mga trabaho.
