CAGAYAN DE ORO CITY – Gikompirmar sa City Disaster Risk Reduction Department o CDRRMD nga nakatala sila’g Inter-tropical Convergence Zone o ICTZ related casualty bunga sa dala nga pagbaha sa pipila ka barangay sa syudad.
Kini human apil ang Zone 7, Mapawa sa Brgy Cugman ang kalit nahiagom sa pagsaka sa tubig-baha diin usa ka senior citizen ang gianod-patay kay gilugwas ang babayeng-motorista sa miaging Sabado sa gabii.
Giila ni CDRRMD manager Nick Jabagat ang biktima nga si Willy Manggubat,66 anyos,construction worker,minyo ug nagpuyo sa susamang barangay.
Gibutyag ni Jabagat nga kompirmado nga naluwas ni Manggubat ang ‘riding-motorcycle’ nga babaye nga si Gelgel Autor kay nalukong sa tubig-baha apan nagbugti usab kini sa pagkawala sa iyang kinabuhi.
Namahayag ang opisyal nga gibalikan pa ni Manggubat ang pagpangita nga motorsiklo ni Autor apan gibanlas na kini sa tubig-baha palugsong sa ubos nga bahin niadtong tungura.
Kini ang hinungdan nga gilayong gikasa ang pagpangita aron luwason apan Domingo na sa buntag nadiskobrehan ug wala na’y kinabuhi distansya sa lokasyon nga nakahimo kini’g pagluwas kang Autor.
Hisayrang sa pag-igo sa ITCZ sa Mindanao particular dinhi sa rehiyon, grabe na ang mga pagbundak sa pag-ulan nga adunay kadungan nga pagbaha diin tipik sa grabeng apektado sa urban flooding ang pipila kabarangayan ning syudad.(Photo:Archelie Cedenio)
