CAGAYAN DE ORO CITY – Naghimas na’g rehas ang 30 anyos nga mangingisda nga akusado sa duha ka ihap sa statutory rape ug laing two counts sa sexual assault sa korte sa Lanao del Norte.
Kini human nasilbi sa tracker team sa Maigo Municipal Police Station ang magkalahi nga arrest warrants batok sa dinakpan nga si alyas Brian,minyo,mangingisda nga nagpuyo sa lugar.
Saysay ni Police Regional Office 10 spokesperson Major Joann Navarro nga unang midangop sa Maigo PNP ang 12-anyos nga biktima kuyog sa iyang pamilya Marso ning tuiga nga kini gisikmoy sa akusado niadto pang Disyembre 2024.
Matud ni Navarro nga nasuta sa mga imbestigador nga nalangan ang pagtaho sa biktima kay mitigbabaw ang kalisang kay mibahad ang akusado nga patyon siya.
Sa paglugwa sa kasuguan sa korte, gilayong gikasa ang hiniusang operasyon diin kakuyog sa Maigo PNP ang Provincial Intelligence Unit sa Lanao del Norte Police Provincial Office, 5th Special Operations Unit – PNP Maritime Group SBC SND, Tangcal MPS, Magsaysay MPS ug Pantao Ragat MPS aron masiguro ang pagbitbit sa akusado atubangan sa husgado.
Wala mosita ang korte sa piyansa sa mga kasong giatubang ni Brian rason gikustodiya sa regular jail facility.
Dumduman nga kalit gibunlot sa akusado ang biktima padulong sa kasagingan nga gikan mitambong sa vigil ug gipahimudsan ang kahuyang sa maong tuig.
Dugtong niini,namahayag si PRO 10 regional director Brig Gen Rolindo Suguilon nga ang pagkasikop sa akusado ang pamatood sa PNP ug ubang ahensiya sa gobierno alang sa pagpangita’g hustisya ilabina sa mga biktima heinous crimes such sana sa lugos ug sexual assault.
