CAGAYAN DE ORO CITY – Naaresto ang aktibong pulis kuyog ang laing duha ka sibilyan sa gilusad nga random checkpoint sa Purok 1,Brgy Butadon,Kapatagan,Lanao del Norte.
Gibutyag ni Police Corporal Roel Benesen,imbestigador sa Kapatagan Police Station nga naharang sa tropa ni Lt Col Shirwen Lapiz,kumander sa 2nd Provincial Mobile Force Company pinaagi nila ni Major Neil Clifton Pugoy ang kolor puti nga pribadong sakyanan diin gisakyan sa mga dinakpan kuyog ang suspected smuggled cigarettes.
Giila ang mga dinakpan nga sila Police Staff Ernesto Ladroma Jr, 44 anyos,taga-lungsod sa Tandag City;Luis Philip Castro,24,drayber nga taga-San Miguel ug Mikel Learns Cardento,22 anyos nga pulos gikan sa Surigao del Sur.
Nasuta nga gikan sa Zamboanga Peninsula ang mga dinakpan ug padulong unta sa lungsod sa Kapatagan kaganihang kadlawon.
Sa pagsusi sa tropa ni Pugoy sa sakyanan, misugat kanila ang mga sigarilyo nga gisulod sa garbage bag .
Sa pagsiguro nga masunod ang balaod, gitawag sa mga pulis ang ubang elected brgy officials sa lugar aron saksihan ang pagkompiskar sa mga kontrabando.
Nasayran nga gikan sa lungsod sa Ipil,Zamboanga Sibugay ang kontranbado nga tuyo ipasulod sa Surigao del Sur.
Naka-kustodiya una ang mga dinakpan sa mini-cell sa Kapatagan PNP alang sa dugang aksyon samtang ang sobra tunga-milyones pesos nga mga sigarilyo ang gitakdang itugyan sa Bureau of Customs-Iligan City.
