CAGAYAN DE ORO CITY – Ma-kustodiya sa jail facility sa Cagayan de Oro City sa dili madugay ang duha ka akusado nga gitudlong maoy mipusil-patay kang 2023 Mr. Cagayan de Oro candidate Adriane Rovic Fornillos.
Kini human kompirmaha sa Pagadian City Police Station nga milampos ang Cagayan de Oro City Police Office operatives pagsilbi sa court arrest warrant order sa kasong murder batok sa duha ka dinakpan nga nagtagu-tago sa syudad sa Pagadian,Zamboanga del Sur ning semanaha lamang.
Matud sa ilang gilugwa nga pahayag,nakig-koordinar kanila ang COCPO sa maong katuyuan rason nga giporma ang joint manhunt operation team kuyog ang Zamboanga del Sur Police Provincial Office aron lusubon ang lokasyon sa mga dinakpan.
Gidala una sa Pagadian City PNP custody alang sa tukmang proseso ang mga dinakpan ug sa dili madugay dad-on na kini sa Cagayan de Oro aron e-presentar sa Regional Trial Court Branch 17 nga maoy naghawid sa kaso.
Dumduman nga gipusil si Fornillos sa ulo sa wala mailing mga tawo samtang modalikyat na unta kini sa iyang higala aron mag-ensayo sa giapilan nga beauty pageant gikan sa gym session niini sa Brgy Nazareth ning syudad niadtong Mayo 9, 2023 sa gabii.
Unang gipahayag kaniadto sa COCPO nga hayan ‘crime of passion’ ang nagtukmod sa kamatayon sa biktima.
Hisayrang wala madugay gilugwa sa korte ang mando de aresto batok kang Pastor Dimver Andales ug Pastor Jether Nonot rason detinado sa city jail kay na-implikar ang mga pangalan sa case build up investigation sa proseksuyon ug kapolisan.
