CAGAYAN DE ORO CITY – Gipresentar sa kapolisan sa korte ang duha ka gitudlong akusado nga maoy mipusil-patay sa Mr. Cagayan de Oro candidate nga si Adrian Rovic Fornillos ning syudad.
Kini subay sa gitaho ni Police Capt. Emilita Simon,deputy spokesperson sa Cagayan de Oro City Police Office/COCPO kabahin sa maong isyu.
Miingon si Simon nga pinaagi sa pagkadakpan sa duruha ka akusado nga taga-Pagadian City sa miaging semana,mapalig-on ang kasong murder nga giduso sa pamilya sa biktima ngadto sa mga sinumbong.
Siya miingon nga hinoon,layo pa ang pagkab-ot sa hustisya apan makatabang sa pagpalig-on sa mga ebedensiya ang posibleng mga iyagyag sa mga dinakpan aron mahukasan kung kinsa ang tinud-anay nga utok sa kamatayon sa 24 anyos nga biktima.
Hisayrang tipik sa mga gi-implikar sa kamatayon ni Fornillos ang duha ka pastor nga giingong nagsumikad ang motibo gumikan sa naghinobrang gibati nga gugma ngadto sa usa lang ka babaye nga ilang giilogan.
