Suportado ni Stella Ferrarez, usa ka mental health advocate, ang panawagan sa mga magtutudlo nga taasan ang ilang sweldo, tungod kay para kaniya, bug-at ug dakong tahas ang ilang ginasabakan matag adlaw.
Gipasabot ni Ferrarez nga ang pagtudlo dili lang kutob sa pagpasabot sa leksyon, kundi pagtudlo sa kinabuhi ug paggiya sa kaugmaon sa mga estudyante.
Matod pa ni Ferrarez, ang mga magtutudlo dili lang propesyonal, kundi mga alagad nga adunay kasingkasing sa serbisyo.
Ang pagtudlo, para kaniya, usa ka noble nga bokasyon, diin ang usa ka magtutudlo adunay pagpaningkamot ug paglaom nga magtudlo sa sakto, kay ang kaugmaon sa estudyante ug sa nasud anaa sa ilang mga kamot.
Gidugang pa ni Ferrarez nga ang mga magtutudlo karon angay gyud nga tagaan og mas taas nga sweldo, isip pag-ila sa ilang sakripisyo ug papel sa pagtukod sa usa ka maayong katilingban. (James Oliver)
