Pormal nang gisang-at sa Office of the Ombudsman ngadto sa Sandigangbayan ang unang kaso batok kang kanhi Ako Bicol party-list representative Zaldy Co. Kini may kalabutan sa 289 milyon pesos nga flood control project sa Oriental Mindoro. Namahayag si Assistant Ombudsman Atty Mico Clavano nga lakip nga atubangon ni Co ang malversation of public funds pinaagi sa falsification of public documents, ug duha ka kaso sa graft nkalabot sa non-existent nga proyekto sa Mag-Asawang Tubig River. Lakip sa giakusahan ang pipila ka opisyal sa DPWH Region 4B ug mga direktor sa Sunwest Corporation, nga giingong kompanya ni Co. Gilauman nga patung-patong pa nga kaso ang iyang atubangon samtang nagpadayon ang imbestigasyon sa iskandalo.
