Mihatag katin-awan si Batangas 1st District Rep. Leandro Legarda Leviste sa mga pagsaway nga iyang nadawat, epekto sa mga nagkatag nga fake news nga milambigit sa iyang dungog. Namugos ang batan-ong kongresista nga bisan piso, wala siyay nabulsa sa gobyerno tungod kay wala siyag ghost projects. Mitin-aw kini nga ang kontrata nga nakuha sa iyang kompanya, pulos mga permits gikan sa private investment, gamit ang iyang kaugalingong puhonan, ug gi-ukbog sa iyang gipanag-iya nga luna. Hugtanong gihimakak ni Leviste nga gihampakan sa P24-Bilyon nga multa ang iyang kompanya sama sa Solar Philippines. Dili usab tinood ang report ni Palace Press Officer Atty Claire Castro nga namaligya siyag kompanya nga adunay prangkisa, tungod kay ang nabaligya niya nga propiedad, walay prangkisa. Kini ang rason nga iyang napasaka ang kasong libel sa tigpamaba sa palasyo.
