(Update) CAGAYAN DE ORO CITY -Misaka na sa lima ka kinabuhi nga gilakipan sa upat ka pulis ug usa ka sibilyan ang nakalas sa dugu-ong pagka-aksidente sa patrol car sa 2nd Provincial Mobile Force Company sa Brgy Napangan,Don Victoriano,Misamis Occidental.
Kini sumala sa kompirmasyon ni Police Capt Al-Rafat Sapie,hepe sa Don Victoriano Municipal Police Stationnga pasiunang mihatag sa impormasyon kabahin sa gidangatan sa mga biktima kaganihang udto.
Sumala sa inisyal nga imbestigsayon,gikan sa Lake Duminagat ang patrol isip escort sa organizers sa Bb Pilipinas padulong sa Peduan Falls dihang naaksidente pag-abot sa lugsungon nga bahin sa dalan.
Nawad-an usab daw sa control ang sakyanan rason nga nahulog sa bakilid nga bahin sa maong lugar.
Subay usab sa nakuhang impormasyon sa Bombo Radyo,kabahin sa namatay sila Police Staff Sgt Vilcon Macabugto, Patrolmen Neljie Marban,Rudilyn Pacut ug Louel Cordova nga pulos ubos sa 2nd PMFC sa MisOcc PNP.
Apil usab sa namatay ang sibilyan nga si Christine Tan Fortich nga konektado sa provincial tourism office sa Misamis Occidental.
Gawas sa mga namatay,anaa pa sa tulo ka pulis ang seryoso ang kahimtang ug laing duha ka sibilyan ang angol sa aksidente.
Nagpadayon pa ang imbestigasyon sa hitabo.
