Nakabati og insulto ang San Sebastian College-Recoletos College of Law tungod sa alegasyon ni Ramil Madriaga nga gigamit kuno ni Vice President Sara Duterte ang iyang impluwensya sa associate dean aron makapasar sa abogasya.
Sa pakighinabi sa Bombo Radyo, miingon si Atty. Teodoro A. Pastrana, Dean sa San Sebastian College-Recoletos College of Law, nga walay kamatuoran ang maong sumbong ug klaro nga dili kini kabahin sa ilang sistema sa San Sebastian College of Law, diin siya mismo miyembro sa faculty niadtong panahon nga estudyante pa si Duterte.
Dugang pa niya, mapamatud-an nila nga wala gyud ingon ana nga kalakaran sa ilang tunghaan ug dili angay pasanginan ang ilang mga magtutudlo sa mga paratang nga walay basehan.
Gipadayag usab niya nga sukad kaniadto hangtod karon, hugot nga dili motugot ang institusyon sa bisan unsang iregularidad sa akademikong proseso, ilabi na sa paggrado ug pagpasar sa mga estudyante.
Tungod niini, iyang gipunting nga dili lamang San Sebastian kondili kadaghanang College of Law sa nasod ang dili mouyon sa bisan unsang pamaagi nga makadaot sa integridad sa legal nga edukasyon.
