Dakong garbo ni MGen. Michelle Anayron, Commanding General sa 4th Infantry Diamond Division (4ID), nga sa dili pa matapos ang iyang termino isip commander, daghan siyang naluwas nga kinabuhi pinaagi sa kampanya batok sa militanteng grupo.
Matod ni Anayron, sa kapin gatus ka mga miyembro nga kaniadto natumbok sa militar, mokabat sa 70 porsyento ang mipili sa pagsurender ngadto sa gobyerno.
Dugang pa niya, gamay ra ang nahitabo nga mga namatay kumpara sa kadaghan sa mga mibiya sa armadong kalihukan ug mibalik sa malinawon nga kinabuhi.
Sumala pa sa heneral, ang sunod‑sunod nga operasyon ug mga engkwentro sa tropa maoy nakaaghat sa daghang rebelde nga mohunong ug motahan sa gobyerno.
Gipasiugda usab niya nga mas importante alang kaniya ang kadaghan sa mga naluwas kaysa sa ihap sa mga napukan sa bakbakan.
Giila ni Anayron nga kini usa sa labing mahinungdanong nahimo sa 4ID sa ilang kampanya alang sa kalinaw sa rehiyon.
