Gipadayag ni Stella Ferrarez, usa ka mental health advocate, nga dako og ikatabang ang pag-apil sa SOGIE ug sex education sa mga tulonghaan aron masabtan sa mga batan-on ang ilang kaugalingong identidad.
Matud pa ni Ferrarez, base sa psycho-social stage of development ni Erikson, ang mga bata nga nag-edad og 13 hangtod 16 anyos angay nang mahatagan og igong edukasyon bahin niini aron malikayan ang mental health problems sama sa anxiety ug depression.
Hinuon, giingon sa eksperto nga imbes sa senior high school lang kini itudlo, mas maayo unta kung mas sayo pa kini ipaila-ila sa mga estudyante.
Pinaagi niini, masiguro nga makab-ot sa mga batan-on ang lig-on nga pag-ila sa ilang kaugalingon samtang nagtubo sila. Tungod niini, gipasabot ni Ferrarez nga ang maong lakang usa ka kamatuoran ug realidad nga kinahanglan gyud dawaton ug suportahan sa katilingban.
