Gi-klaro sa City Disaster Risk Reduction and Management Department nga layo sa mga sementeryo ug gawas sa operasyon sa Kalag-Kalag ang nahitabong pagkalumos sa duha ka babayeng menor de edad sa Barangay Pagatpat niadtong adlaw sa mga santos.
Gibutyag ni CDRRMD Head Nick Jabagat nga gi-deklarang dead on arrival sa JR Borja General Hospital ang mga biktima nga nag-edad og 12 ug 13 anyos human ma-anod sa Iponan River.
Gipasabot sa opisyal nga pulos taga-Habitat relocation ang mga biktima nga nangaligo sa suba tungod sa kainit sa panahon apan walay igong kasinatian sa sulog ug kalalom sa maong lugar.
Tungod niini, nanawagan ang buhatan sa mga opisyal sa barangay nga pahugtan ang pagbadlong sa mga bata nga mangaligo sa suba aron malikayan ang trahedya.
