Sen. Gatchalian, giduso ang sugyot nga magdili sa mga kabanay sa opisyal sa pagkuha’g kontrata sa kagamhanan

Giduso ni Senate President Sherwin Gatchalian ang hinanali nga pagkahimo og balaod sa sugyot nga magdili sa mga kabanay sa mga opisyal sa gobyerno nga makakuha og kontrata gikan sa kagamhanan.

Gihatagan og gibug-aton ni Gatchalian ang panginahanglan nga mahimong balaod sa labing daling panahon ang Senate Bill No. 1962 o ang Government Contracting and Procurement Integrity Act aron masiguro nga mapadulong ang pondo sa nasud ngadto sa mga programang makapahimulos ang publiko.

Matud ni Gatchalian, dili angay nga mapadulong ngadto sa mga kabanay sa mga anaa sa gahum ang mga oprtunidad nga gipundohan sa katawhan.

Ubos sa maong sugyot nga balaod, dili mamahimong makakuha og government contracts ang mga kabanay sa mga nalakip nga opisyal hangtud sa fourth civil degree of consanguinity or affinity, lakip na usab niini ang katugbang nga kabanay pinaagi sa kasal.

Sakop sa maong sugyot ang nagkalin-laing kontrata sa kagamhanan, lakip niini ang pagpalit sa kahimanan ug serbisyo, ingon man usab ang mga proyekto sa imprastraktura ug uban pang kasabutan gipundohan sa gobyerno.

Tumong niini nga mapugngan ang paggamit sa posisyon ug impluwensya sa mga opisyal aron makabaton og dili patas nga bentaha sa pgakuha og kontrata sa kagamhanan.

Mahinumdoman nga giaprubahan sa Senado sa ikatulo ug katapusang pagbasa ang Senate Bill No. 1962 niadtong Setyembre 2, 2026, pinaagi sa boto nga 15-0, apan dili pa kini hingpit nga balaod ug nanginahanglan pa kining moagi sa mosunod nga lakang sa proseso sa pagkahimo niining balaod ayha kini hingpit nga mapatuman. (raniel mahunyag)