CAGAYAN DE ORO CITY – Gipasalig sa City Internal Affairs Service o CIAS ang patas nga pagdungog sa kasong administratibo batok sa aktibong pulis nga namusil-patay sa police asset sa Tangkungan,Sitio Pinikitan,Brgy Camaman-an ning syudad.
Sa interbyu sa Bombo Radyo,gibutyag ni CIAS chief Lt Col Henry Cay-as nga bug-at ang giatubang nga pasangil sa ilang kaubang pulis apan wala nagpasabot nga basta-basta na sila mopakanaug sa ilang hukom nga wala moagi sa subsob nga imbestigasyon.
Siya miingon nga tungod ka seryoso sa kremin nga gipakang batok sa aktibong pulis, gipaniguro usab nila nga moagi sa mitikulusong imbestigasyon aron makab-ot ang substancial evidence nga basehan sa ilang ipakanaug nga hukom.
Gibutyag ni Cay-as nga gilayon nila itugyan sa Police Regional Office 10 ang resulta sa imbestigasyon aron mahukman ang kapalaran sa maong pulis.
Hisayrang maoy nagsilbing biktima sa pagpamusil-patay sa wala panganli nga pulis ang iyang kanhi police asset nga si Henry Pimentel nga taga-Brgy Macasandig dihang midalikyat kini sa Brgy Camaman-an kagahapon sa kadlawon.
