CAGAYAN DE ORO CITY – Gihimakak sa kadagkuan sa Cagayan de Oro City Police Office ang alegasyon sa pipila ka netizens nga ‘fall guy’ ang nasikop nga akusado sa pagpatay kang Brgy. Carmen Kag. Roland ‘Tawee’ Uy, kinsa anak ni City Mayor Rolando ‘Klarex’ Uy.
Gidakop sa kapolisan ang akusadong si Edgardo Gaabucayan sa iyang gitaguan sa Purok 6, Brgy. Cabasagan, Lala, Lanao del Norte pinasikad sa warrant of arrest nga gi-isyo sa korte tungod sa kasong double murder.
Miingon si COCPO Deputy Director for Operations Col. Surki Sereñas nga kompirmadong si Gaabucayan ang responsable kay mitugma ang hulagway niini sa cartographic sketch nga ilang naporma pinaagi sa description nga gihatag sa testigo sa kremin.
Dugang pa ni Sereñas nga walay hunong ang surveillance sa kapolisan sa gitagu-an ni Gaabucayan hangtud nga gipagawas sa korte ang warrant of arrest.
Si Tawee uban sa iyang sinaligan nga si Samuel Pabalan ang gipusil-patay sulod sa quarry site sa Brgy. Pagatpat niadtong Nob.11, 2021.
Samtang nagtoo usab si Serenas nga mibiya na sa kalihukan sa walhong grupo ang akusado sa pagpatay kang Uy nga si Gaabucayan.
Gibutyag ni Sereñas nga may nadawat silang impormasyon nga konektado gihapon si Gaabucayan sa CPP-NPA apan ila pa kining gi-imbestigaran.
Samtang namahayag usab kini nga ‘personal grudge’ ang ilang nakitang motibo sa pagpatay kang Uy apan posibleng mogawas ang uban pang motibo kon itug-an ni Gaabucayan ang mastermind sa kremin.
