CAGAYAN DE ORO CITY-Gibali sa Court of Appeals 23rd Special Division ang hukom sa Ombudsman aron konbiktuhon sa kasong grave misconduct si Congressman Frederick Siao, kanhi Vice Mayor Ruderick Marzo ug laing mga konsehal sa Iligan City.
Kini human unang nakit-an sa Ombudsman nga sad-an sila si Siao sa kasong kurapsyon tungod sa pag-renta sa kabtangan nga gihimong terminal sa Barangay Tomas Cabili sa maong syudad.
Gibutyag sa hukom sa CA nga dili mahimo nga silotan sa Ombudsman sila si Siao, Marzo, Marlene Young, Michelle Sweet-Booc, Roy Openiano, Riza Jane Magaro, Jose Zalsos ug Providencio Abragan Jr kay dili pa sila mga opisyal sa pagpasar sa resolusyon sa gisudlang transaksyon.
Nasayran nga si Lawrence Cruz pa ang nagsilbing mayor sa Iligan City dihang miduso’g kaso si Dexter Sumaoy sa Ombudsman.
