CAGAYAN DE ORO CITY-Namugos ang kadagkuan sa Cagayan de Oro Water District o COWD nga dili nila ipatong sa mga konsumante ang pagdako sa ilang bayronon sa na-konsumo nga tubig gikan sa Metro Pacific Water Consortium.
Kini human angkona sa COWD nga anaa sa 53 porsiento o 19 milyon pesos gikan sa kapin 12 milyon pesos ang bayronon nila sa MetroPac sulod ning bulana.
Miingon si COWD Asst General Manager for administrator Engr Beinvenido Batar Jr nga ang 16 pesos nga baligya sa MetroPac kanila ang nasubay lamang sa nauyunan sa pirmado nila nga kontrata.
Una niini,mibiya ang COWD sa Rio Verde apan mao ra usab kini nga kompanya nga gihimong tinubdan sa water supply sa MetroPac sa western side ning syudad.
Samtang gikonsiderar sa public utilities committee sa konseho nga idangop nila sa Ombudsman ang gisudlan nga water venture tali COWD ug Metro Pacific Consortium.
Kini human pabiling gisupak sa komitiba ilabina nga na-insulto ang city govt niini kay gihilom sa COWD ang maong transaction.
Miingon si Kag Bong Lao,chairman sa maong komitiba nga usa kini sa ilang i-adaptar kon ugaling dili nila makuha ang paborabli nga hukom sa Philippine Competition Commission ug korte.
