Nagkatigom ang mga doktor, mga parente, ug mga boluntaryo sa Red Cross sa siyudad sa Bunia sa sidlakan nga bahin sa Democratic Republic of Congo (DRC) alang sa lubong sa usa ka doktor nga namatay human motambal sa mga pasyente nga adunay Ebola.
Nagpakita kini sa nagkadako nga kabalaka sa mga frontline health workers samtang misamot ang outbreak.
Miingon si Robert Uneno, presidente sa Itury Medical Association nga bisan pa sa kahadlok sa mga health workers, magpadayon gihapon sila sa ilang katungdanan aron matabangan ang mga apektadong pasyente.
Gipahimangnoan usab niini ang mga lumulupyo nga motuo ug motabang sa mga otoridad aron mapugngan ang paglapad sa sakit, kini taliwala sa nagpadayong kakulang sa suplay, pagpang-atake sa health facilities ug kahuyang sa health system.
