(Update) CAGAYAN DE ORO CITY – Kasuha’g murder sa PNP isip complainant ang 23 anyos nga lalaki nga brutal nga miputol sa ulo sa wala mailang babaye diha sa Purok 4,Brgy Punta Santiago,Talisayan,Misamis Oriental kagahapon sa kadlawon.
Kini human gikaon pa sa suspek nga Lloyd Bagtong ang utok sa biktima isip sud-an sa pamahaw dihang nasikop sa kapolisan sulod sa ilang pinuy-anan sa maong lungsod.
Miingon si Talisayan Police Station commander Capt Maribeth Rapuga nga ipasusi usab nila ang kahimtang sa utok sa suspek kon tinood nga may depekto.
Una niini,nagkagubot ang katawhan dihang nakit-an daplin sa dalan ang 25 ngadto 30 anyos nga babayeng wala na’y ulo kay giputol ni Bagtong ug gidala sa ila aron himoong sud-an sa pamahaw.
Samtang gikakurat pag-ayo ni Gov Bambi Emano ang ngilngig nga kamatayon sa babaye nga giputla’g ulo sa lalaki nga armado sa hait nga ‘sanggot’ sa Talisayan,Misamis Oriental.
Miingon ang tigpamaba sa kapitolyo probinsyal nga si Carlo Duga-Duga nga gusto ipasusi ni Emano ang kagikan sa suspek kon nganong nakahimo kini sa linu-og nga binuhatan sa biktima.
Una niini,gibutyag ni Bagtong nga nahinaykan niya ang biktima kay sige’g estorya sa eninglis ug mibati pud siya’g kagutom hinungdan gigulgol niini ang li-og gamit ang hait nga ‘sanggot.
