CAGAYAN DE ORO CITY-Patay ang usa ka lola samtang samaron ang iyang bana human gibunala’g kahoy sa usa ka hubog sa Purok 6, Talakagan El Salvador City, Misamis Oriental.
Giila ang namatay nga si Rosa Acuno, 65-anyos samtang angol ang iyang bana nga si Domingo Acuno, 80-anyos, pulos residente sa maong lugar.
Matud ni El Salvador City Police Station deputy commander Insp Larry Inciso nga nagdumot ang suspek nga si James Lou Ragot alyas Botsoy, 33-anyos sa mga biktima hinungdan nga gisudlan niini ang ilang panimalay ug gibunala’g kahoy hangtud mamatay.
Gidunggab usab sa suspek ang biktima nga si Domingo kinsa nakaangko’g samad sa braso.
Hisayran nga nasuko ang suspek sa mga biktima tungod kay kanunay kining tawgon nga ‘buang’.
Samtang dili makatubag ang suspek nga si alyas Botsoy sa rason kon nganong iyang gibunala’g kahoy ang magtiayong Acuno.
Sa ekslusibong interview sa Bombo Radyo, gibutyag niini nga wala siya masayod kon nganong iyang nahimo ang krimen.
Apan giangkon ni Botsoy nga lango siya sa ilimnon nga makahubog sa dihang iyang gibunala’g kahoy ang biktima nga si Rosa Acuno ug gidunggab ang kapikas niini nga si Dominggo Acuno.
Hisayran nga ang maong suspetsado ang bag-ohay lamang nakaggawas sa rehabilitation center human malambigit sa paggamit sa illegal nga droga.
