CAGAYAN DE ORO CITY-Gibaharan karon sa kadagkuan sa Misamis Oriental Provincial Jail o MOPJ ang tanang mga piniriso nga dili supakon ang gipatuman nga patakaran niini.
Kini sa tuyo nga dili masilotan sama sa pagpaubos sa bartolina ug pagwagtang sa pipila ka pribilihiyo sama sa pagdawat sa mga dalaw.
Gihimo ni Provincial Warden Dominador Tagarda ang pasidaan tungod sa iskandalo nga gihimo ni detained PO3 Alejandro Ubanan nga nagpasiugdan sa live-show tali sa usa ka lalaki ug piniriso nga bayot.
Miingon si Tagarda nga susamang silot ang mapahamtang sa mga piniriso nga mosupak sa mga patakaran sa maong prisohan.
Si Ubanan ingon man ang duha ka nag-live show ang sunod-sunod nga gipaubos sa bartolina tungod sa law-ay nila nga gihimo sulod sa maong bilangguan.
