CAGAYAN DE ORO CITY-Ipatangtang ni DAR Sec John Castriciones ang ilang provincial chief legal counsel nga nasikop nga naghit-hit sa gitoohang shabu sulod sa pinuy-anan niini diha sa RER Subd,Brgy Kauswagan ning syudad kagahapon sa hapon.
Kini human dismayado si Castriciones sa giingong binuhatan ni DAR-Misamis Oriental chief legal counsel Atty Mario Jay Pielago dihang nasikop sa joint search warrant operation sa PDEA-10 ug City Intelligence Unit sa maong lugar.
Miingon si Castriciones nga ipaubos nila sa pag-imbestigar si Pielago aron basehan kon angay kining paphaon sa puwesto sa ilang ahensiya.
Samtang wala na gikakurat ni DAR regional director Faisar Mambuay ang pagkasikop kang Pielago kinsa chief legal officer sa DAR-Misamis Oriental.
Nadakpan si Pielago human mapalugwa sa korte ang search warrant ug gisilbi PDEA-10 sa iyang balay sa RER subdivision, Brgy Kauswagan ning syudad.
Una niini, gimando ni Mambuay nga ipa-drug test ang tanan empleyado sa DAR-10 niadtong miaging tuig.
Giangkon ni Mambuay nga nakadungog na siyang daan kabahin sa giingong pagkalambigit ni Pielago hinungdan nga gimando ang mandatory drug test.
Samtang gikasuko sa kabanay ni Pielago ang pagtawag sa PDEA-10 nga siya high value target o high profile sa hisgutanan sa pagpahuyot sa gidiling droga sa syudad.
Miingon ang sister-in-law ni Pielago nga si Atty Evangeline Carrasco nga naggikan sa maayo nga kaliwatan ang ilang pamilya sukwahi sa pasangil sa mga otoridad.
Gibutyag ni Carrasco nga i-kuwestiyon nila ang teknilidad sa atubangon nga kaso ni Pielago.
Una niini,giangkon ni Pielago nga tiggamitan kini’g gidiling droga apan mihimakak nga iya ang nakuha nga 15 gramos nga shabu atol sa operasyon sa PDEA-10 ug PNP kagahapong adlawa.
