CAGAYAN DE ORO CITY-Gitin-aw ni Misamis Oriental Provincial Jail Assistant Warden Jose Madarietta nga usa ka semana nga magpabilin sulod sa bartolina si PO3 Alejandro Ubanan.
Si Madarietta miingon nga ilang patilawon sa disciplinary action si Ubanan tungod sa iyang salaod nga nahimo aron dili buhaton sa uban.
Una niini, nagpasiugda si Ubanan sa live-show tali sa lalaki ug bayot nga piniriso sulod sa maong prisohan sa miaging semana.
Gibulgar usab ni Madarietta nga gibayaran ni Ubanan sa tag-P100 ka pesos ang lalaki ug bayot nga nag-live show sulod sa maong bilangguan.
Matud ni Madarietta nga plano ni Ubanan nga siya lang ang molantaw sa gihimo sa duha ka binuhat apan nahibal-an kini sa uban hinungdan nga nabulabog.
Nagtoo si Madarietta nga dili kini ang unang higayon nga gihimo kini ni Ubanan.
