CAGAYAN DE ORO CITY – Gibuhian na gikan sa kustodiya sa kapolisan ang drayber sa wing van pipila ka oras gikan sa dugu-ong bangga ngadto sa motorsiklo sa highway sa Villanueva,Misamis Oriental.
Kini taliwala nga nag-resulta sa kamatayon ni Private First Class Resvonni Almiranes,33 anyos,minyo nga taga-Davao Oriental ug nadestino sa 28th IB,Philippine Army nga nakabase sa lungsod sa Malitbog,Bukidnon ang panghitabo.
Giasoy ni Police Lt Roberto Llausas,deputy commander Villanueva Police Station nga gikan pa naghatod sa mga suplay sa lungon ang wing van sa Agusan del Sur ug sa paghidangat sa ilang area of responsibility,natigayon ang aksidente.
Sa paisunang imbestigasyon,nanugilon ang wing van driver nga misugat kaniya ang motorsiklo sa biktima hinungdang naglisod na kini’g likay ug nahitabo ang panagsungag.
Gidala pa sa Northern Mindanao Medical Center ang biktima apan wala na maluwas pa sa mga doctor nga nag-atiman niini.
Sa pagkutlo usab ning balita,nagka-sinabot na ang pamilya sa biktima ug ang agalon sa wala panganli nga drayber aron nga gawasno na kini.
Hisayrang ang nahiaguman nga ‘head injuries’ ang gitumbok nga hayan rason sa kamatayon sa biktima.
