CAGAYAN DE ORO CITY – Nahandusan na sa kasong robbery with intimidation sa kapolisan ang unom ka lalaki nga gitudlong nanulis sulod sa balay sa aktibong brgy kapitan sa Purok 3,lungsod sa Kinoguitan,Misamis Oriental.
Gibutyag ni Police Regional Office 10 spokesperson Major Joann Navarro nga subay kini sa gitaho ni Kinoguitan Police Station commander Capt Eugene Zambrano ngadto sa ilang kadagkuan sa Misamis Oriental Police Provincial Office.
Siya miingon nga tungod sa kapaspas sa pag-responde sa grupo ni Zambrano,dali nila nadakpan ang mga tulisan nga nagsakay sa pribadong sakyanan nga nakaabot na sa Purok 2,Brgy Esperanza sa maong lungsod sa Mayo 12 sa kadlawon.
Una nang gibutyag ni Zambrano nga nasignit ang mga dinakpan gamit ang ‘Find My Device’ app sa usa sa mga nakawat nga cellphones.
Kini ang hinungdan nga nalukong sa checkpoint ang maong mga indibidwal ug nasuta nga duha kanila taga-Misamis Oriental ug ang upat gikan pa sa Zamboanga Peninsula sa Region 9.
Pagsaysay sa opisyal nga nakuha sa unang suspek ang klase-klaseng cellphones,nagkadaiyang money currencies nga naglakip sa Philippine peso,Indonesian Rupia,Cambodian Riel,Colombian Peso,ID cards,ATM cards,bags,mga sinina ug mga kalo.
Nakuha usab sa uban mga suspek ang mismong sakyanan nga gigamit nila pagsibat, mga salapi ug daghang klase sa mga ID.
