CAGAYAN DE ORO CITY – Naukay ang katawhan ilabina ang pamilya sa tulo ka kalalakin-an kabahin sa gidangatan nila nga unang nabaniug nga nakakita’g ‘gold bar’ sa Purok 4, Balintad, Baungon, Bukidnon.
Kini human nag-resulta sa dakong disgrasya kay ang gitoohang bulawan ang kalit mibuto dihang gigabas na sa mga biktima hinungdan nga naangol sila sa maong lugar.
Gidali sila pagdala sa rescue team padulong sa Northern Mindanao Medical Center aron unta mahatagan sa medikasyon sa mga samad gumikan sa maong kalit nga eksplosyon.
Apan subay sa pagsugilon sa mga pulis sa Baungon Police Station nga patay nang nadangat sa NMMC ang 15 anyos nga lalaki nga maoy nahiagom sa grabeng epekto sa pagbuto sa eksplosibo.
Sa pagkutlo usab ning balita, anaa pa sa ospital ang 33 anyos ug 18 anyos nga mga biktimang lalaki nga nahiagom gihapon sa mga binuthan.
Gihimuan pa sa dugang pakisusi ang mga otoridad ang nahisgutang hitabo kagahapong adlawa.
