CAGAYAN DE ORO CITY – Nag-resulta sa panagsabot sa panig sa mga pamilya nga namatyan ug sa agalon sa van driver ang dugu-ong bangga tali sa multicab sa national highway sa Brgy Buko,Kinoguitan,Misamis Oriental.
Kini human nagkauyon ang duha ka panig nga wala pa’y pagsinang-atay sa kaso apan tubagon na lang ang obligasyon ilabina sa pag-atiman sa mga namatay ingon man sa mga samaron ug damyos-perhisyo sa aksidente sa maong lungsod sa miaging semana.
Namahayag si Police Regional Office 10 spokesperson Major Joann Navarro nga subay sa dugang taho sa Kinoguitan Police Station nga misulod sa amicable settlement’ ang isigka-panig sanglit aksidente ang pagbangga sa multicab ngadto sa passenger van nga nag-resulta sa kamatayon sa duha ka kinabuhi sa tawo.
Siya miingon nga tungod sa maong kauyunan,nabuhian na ang van driver kay wala nama’y mga kasong criminal nga gisang-at batok kaniya.
Dumduman nga maoy namatay sa aksidente ang multicab driver nga si Joselito Baclayon nga taga-Alubijid ug Joni Tedlos nga residente usab sa Laguindingan ning lalawigan nga naka-kontrata sa trabaho sa Misamis Oriental Rural Electric Service Cooperative, Incorporated/MORESCO-2.
Hisayrang padulong sa Balingoan ang passenger van nga sakay ang mga atleta kay adunay apilan nga torneyo sa basketbol dihang nawad-an sa preno ang multicab hinungdan sa dugu-ong aksidente.
