CAGAYAN DE ORO CITY – Gawasnon ang upat ka dinakpan apan dili pa luwas sa atubangong mga kasong pagsupak sa Anti-Agriculture Smuggling Act of 2016 ug Customs Modernization and Tariff Act nga ipasaka sa korte sa Iligan City.
Kini human nabawian ang mga dinakpan nga sila Allie,Mohnie,Asoy ug Puding sa suspected smuggled cigarettes nga gisakay sa duha ka magkalahing pribadong sakyanan nga naharang sa moible patrol operation sa Overton,Brgy Maria Cristina.
Gibutyag ni Police Regional Office 10 spokesperson Major Joann Navarro nga unang nasiplatan sa tropa sa Traffic Enforcement Unit sa Iligan City Police Office kinuyugan sa Police Station 2-ICPO ang kadudahang mga lihok sa mga suspek rason gipaubos sa pagsusi ang ilang mga gisakyang sakyanan.
Miingon si Navarro nga unang giduulan sa ilang tropa ang usa ka van nga gimaneho ni Mohnie diin nadiskobre nga adunay mga sakay mga sigarilyo.
Pagduol sa ikaduhang sakyanan nga gimaneho usab ni Puding, laing mga sigarilyo ang nadiskobre ug nabawii sa mga otoridad.
Nasuta nga ang maong mga sigarilyo nagkostar sa halos 5 milyones pesos diin gitugyan na usab sa kustodiya sa Bureau of Customs-Iligan City District.
Dugang pa nga ang maong kontrabando ang gikan sa Baloi,Lanao del Norte ug giingong ipangbaligya unta sa mga syudad sa Cagayan de Oro ug Iligan City.
Una nang detinado ang mga suspek apan gibuhian ra usab kay iagi sa regular filing ang paglamba sa kaso batok sa mga dinakpan sa piskalya sa dili madugay.
Dugtong niini,giyukbuan ni PRO 10 regional director Brig Gen Rolindo Suguilon ang dakong kalampusan nga nahimo sa ilang lower units batok sa walay undang nga kampanya kontra smuggling activities sa Northern Mindanao.
Hisayrang sa miaging semana,naka-kompiskar usab ang kapolisan sa 20 milyones pesos sa mga sigarilyo nga giagi sa coastal waters sa westeng bahin sa Misamis Oriental.
