CAGAYAN DE ORO CITY – Napatay sa kapolisan ang suspek nga miputol sa ulo ug mikaon sa utok sa babaye sa Brgy Punta Santiago,Talisayan, Misamis Oriental.
Kini human giingong nangilog sa armas ang suspek nga si Lloyd Bagtong sa mga pulis paghidangat sa lungsod sa Jasaan ning lalawigan kagahapong adlawa.
Gibutyag ni Jasaan Police Station investigator Police Master Sgt Paul Salcedo nga pauli na unta sa Talisayan gikan gi-inquest proceedings sa provincial prosecutor sa syudad ang suspek kauban ang pulis nga nagbantay niini dihang kalit nga na-flat ang ligid sa ilang gisakyan nga patrol car sa Sitio Punta Gorda, Brgy Danao, Jasaan ning lalawigan.
Nananghid ang suspek nga mangihi rason gitangtangan sa posas apan kalit lamang kining nangilog sa armas sa nagbantay nga pulis ug nabati na lamang ang tulo kabuto sa pusil.
Natumba ang suspek ug daling gidala sa ospital apan gideklara sa mga doktor nga nakabsan na sa kinabuhi.
Kahinumduman nga una nang giangkon sa suspek nga iyang giputlag ulo ang babayeng anaa sa 25-30-anyos ug gikaon ang utok niini sa miaging adlaw.
