CAGAYAN DE ORO CITY- Gisalikway sa Special Investigation Task Group o SITG nga ‘politically related’ ang pag-ambush patay kang Napaliran Brgy Kap Claver Miral sa utlanang bahin sa Jasaan ug Balingasag sa Misamis Oriental.
Kini human patya sa motorcycle in tandem suspects si Miral samtang nakasakay sa iyang motorsiklo gikan sa iyang gitambungan nga birthday party ug pauli na unta sa ilang pinuy-anan sa Balingasag sa miaging Domingo sa gabii.
Miingon si SIGT head Misamis Oriental PNP Director Police Col Rolando Destura nga lahi nga anggulo ang kabahin sa ilang gitutukan kon nganong gipatay si Claver.
Nagdumili una si Destura pagsulti niini sanglit padayon ang ilang pag-imbestigar batok sa mga suspek nga gipaubos na nila sa case profiling.
