CAGAYAN DE ORO CITY – Gikasuhan na sa pagsupak sa mga probisyon sa Dangerous Drugs Act of 2002 sa Republic Act 9165 ang anak ni City Mayor Oscar Moreno nga si Sean Moreno kuyog ang laing 7 ka kauban sa piskalya sa Angeles
City,Pampanga.
Kini human kabahin si Sean nga nasikop sa PDEA-3 operatives sa drug buy bust operation tungod sa giingong pagbaligya sa balor uno milyones pesos nga ecstasy tablets,cocaine ug ubang klase sa ilegal nga droga
sulod sa hotel niadtong Hunyo 29 ning tuiga.
Gibutyag ni PDEA spokesman Derrick Carreon nga si Bernice Fabiosa, 21-anyos ang target sa operasyon apan giangkon niini nga kabahin si Sean nga gapamaligya sa ecstasy gikan sa source nga si Gregorio Imperial, 26-anyos kinsa apil usab sa nadakpan.
Ang grupo ni Sean ang giingong supplier sa party drugs National Capital Region ug uban bahin sa Luzon.
Kabahin usab sa nadakpan sa operasyon sila si Maria Isabel Lawas, 19; Aileen Baldon, 23; Jamie Mendoza, 20; Jessa Scott, 19 ug Bernadeth Saavedra, 19-anyos nga pulos nagpuyo sa Las Pinas City sa kauluhan.
Samtang giangkon ni Moreno nga nakadaut sa iyang integridad ug reputasyon ang pagkasikop sa iyang kinamagulangang anak nga si Sean sa giingong pagbaligya sa drogang ecstasy sa Angeles City, Pampanga.
Sa gipaabot nga mensahe niini sa Bombo Radyo, gibutyag ni Moreno nga bisan sa iyang kasuko ug kasubo sa nahitabo sa iyang anak apan dili niya mahimong talikdan ang obligasyon isip usa ka amahan.
Siya miingon nga iyang seguradohon ang kaluwasan sa iyang anak sulod sa bilangguan ug dili usab siya magduha-duha sa paghatag legal assistance sa 43-anyos niyang anak kon gikinahanglan.
Una nang nadakpan sa Philippine Drug Enforcement Agency Central Luzon si Sean kauban ang pito ka laing suspek sa drug buy bust operation sa usa ka 4-star hotel sa Brgy. Malabanias, Angeles City sa miaging semana.
Narekober sa ilang posisyon ang 310 ka mga ecstasy tablets nga nagkantidad sa P1 milyon.
Si Sean makapila nang nagpaubos sa drug rehabilitation tungod sa pagkagumon niini illegal nga droga.
