CAGAYAN DE ORO CITY – Gi-hunting sa intelligence operatives sa Marawi City Police Station ang mga mamumuno nga gitudlong mga responsabli sa kamatayon sa negosyanteng magtiayong Maranao-Muslims sa Barangay Sarimanok,Marawi City, Lanao del Sur.
Kini human igo na lang nadiskobrehan sa mga pulis nga wala na’y kinabuhi ang magtiayong mga negosyante nga pulos hingkod ang edad nga tag-iya sa usa sikat nga kan-anan nga nakabase sa maong syudad.
Sumala ni Marawi City Police Station commander Lt Col. Muhidin Pagayawan nga komitado sila pagsulbad sa kremin aron molugwa ang kamatuoran ug mahatag ang hustisya sa mga biktima.
Mihangyo usab si Pagayawan sa publiko nga likayan una ang paglugwa’g mga panaghap ug mo-basi lamang sa ipagawas nga resulta sa imbestigasyon.
Una niini,gitahasan ni Marawi City Mayor Majul Gandamra ang kapolisan nga himoon ang lawom nga imbestigasyon aron matuhog ang motibo sa kremin ug matumbok ang pangalan sa mga suspek nga gilayong makasuhan sa korte.
