CAGAYAN DE ORO CITY – Detinado sa karsel sa kapolisan ang 43 anyos nga gitudlong mitigbas-patay sa usa ka kapikas sulod sa kusina sa Puro 2,Brgy Kauswagan,Magsaysay,Misamis Oriental.
Matud sa impormasyon sa Misamis Oriental Police Provincial Office nga giila lamang ang biktima sa pangalan nga si alyas Ate Gating,47 anyos nga nagpuyo sa susamang lugar.
Saysay sa pasiunang imbestigasyon,anaa sulod sa kusina ang biktima ug ang suspek nga si alyas Boy Tigbas sa wala pa nahitabo ang kremin.
Apan pipila ka minutos ang milabay,naukay na lang ang tagbalay ug mga silingan nga nahiagom na sa mga tinigbasan ang biktima sa sundang nga gigamit sa suspek.
Sa pagsuta sa kapolisan sa Magsaysay Rural Health Unit,nadiskobre nga giingong naghupot sa mental illness ang suspek.
Mohimo pa sa dugang imbestigasyon ang mga otoridad kung magamit ba sa suspek batok sa ilang ipasaka nga kaso ang giingong pagsilbing dunay depektoso sa pangutok niini.
