(Update) CAGAYAN DE ORO CITY – Gawasnon na ang trailer truck driver bisan kon nakaligis-patay sa motorcyle backrider sa highway sa Brgy Kauswagan,Lagonglong,Misamis Oriental.
Giila ni Police Staff Sgt Rowell Evan,traffic investigator ubos sa Lagonglong Police Station ang namatay’ng biktima nga si Ignacio Meguilla,hingkod ang edad samtang ang truck driver nga si Bergonio Aminday nga taga-Brgy Sta. Cruz,Tagoloan ning lalawigan.
Gibutyag ni Evan nga padulong sa Caraga region ang trak samtang misulay pag-overtake ang motorsiklo nga gimaneho ni Joquins Bagongon diin nakaangkas si Meguilla hinungdang gikabangga ang laing motorista nga si Angelito Balayo.
Tungod sa pagka-disbalanse sa motorsiklo nga gimaneho ni Bagongon,nalabay si Meguilla ug naligsan sa trak hinungdan sa kamatayon niini.
Gidala usab sa provincial hospital sa Balingasag District Hospital ang mga driver sa duha ka nakabangga nga mga motorsiklo.
Apan nauyunan man sa pamilya ug tag-iya sa trak nga si Joy de la Cruz nga taga-Tagoloan ning lalawigan wala na’y kaso nga ipasaka kay gitubag na ang tanang obligasyon sa hitabo.
Kini ang rason nga gawasnon ug wala na’y kason giatubang si Aminday.
